“ Часопіс “Вясёлка- вясёлы і займальны,
А таксама
пазнавальны.
Гучаць у ім родныя
словы
На роднай,
беларускай мове.
Ёсць у ім песні,
вершы, загадкі,
Казкі, аповесці і
маляванкі…”
Менавіта з гэтых радкоў юнай
паэткі Ксеніі Панкавец, пачалася у Цэнтральнай дзіцячай бібліятэцы імя А.
П.Гайдара прэзентацыя сумеснага праекта бібліятэкі і рэдакцыі часопіса
“Вясёлка” пад назвай “55 колераў
Вясёлкі“. Сапраўднае шматколернае, шматграннае вясёлкавае свята, прысвечанае
адзінаму беларускамоўнаму часопісу для
дашкольнікаў і малодшых школьнікаў, напоўненае вершамі, інсцэніроўкамі,
песнямі, гімнастычнымі нумарамі пакінула
самае найлепшае ўражанне ў гасцей, удзельнікаў і арганізатарў свята… Вясёлка –
гэта ўсмешка прыроды ў блакітным, чыстым пасля дажджу небе, сімвал прыгажосці
на зямлі. Такімі ж прыгожымі былі выступленні дзяцей, удзельнікаў свята, сярод
якіх у першую чаргу хочацца адзначыць удзельнікаў бібліятэчнага гуртка
“Ліхтарык”, што працуе ў ДУА СШ №10 (кіраўнік Р.В.Грынь). Юныя знаўцы роднай
мовы інсцэніравалі казкі беларускіх пісьменнікаў, спявалі частушкі,прэзентавалі
свае асабістыя вершы, загадкі, змешчаныя
ў рукапісным зборніку “Промні Ліхтарыка”. Нечаканым сюрпрызам для дзяцей стала
тое, што госць нашага свята – літаратурны рэдактар часопіса “Вясёлка” Святлана
Богуш агучыла навіну аб тым, што ў чацвёртым нумары часопіса змешчаны вершы
членаў гуртка “Ліхтарык”! Шмат цёплых
слоў прагучала на свяце ў адрас галоўнага рэдактара часопіса, старшыні Беларускага дзіцячага
фонду –Уладзіміра Сцяпанавіча Ліпскага, а юныя чытачы дзіцячай бібліятэкі
Акімаў Дзіма, Вайцяховіч Павел Бабіцкі Уладзіслаў і Бакун Іван прынялі ўдзел у
невялікім хіт-парадзе герояў яго
кніг. А якое ж свята без галоўнага
персанажа часопіса – Васі Вясёлкіна? З вялікім задавальненнем прысутныя ў зале
дзеці адказвалі на пытанні Вясёлкіна і атрымоўвалі салодкія прызы і сувеніры.
Барысаўская паэтка, старшыня літаратурнага аб’яднання “Натхненне”, Лёля
Багдановіч прачытала некалькі вершаў для дзяцей, адзін з іх прысвечаны
55-гадоваму юбілею часопіса.Упершыню ў
зале бібліятэкі паказвалі сваё майстэрства ўдзельнікі цыркавой студыі “Мечтатели”,
а сапраўдным упрыгожаннем свята
з’явіліся музычныя падарункі ад Таццяны Сухамліной з песняй “Я нарисую счастье”
і Вольгі Сыраежка з песняй “Мая Беларусь”. Вяселкавае свята прадаўжае сваё шэсце па бібліятэках
Барысаўшчыны, наперадзе нас чакае яшчэ шмат цікавых і яркіх мерапрыемстваў у
розных колерах Вясёлкі.
